Инцидентот се случил на лет од Минеаполис, Минесота до Минот, Северна Дакота. „СкајВест“ објави дека авионот добил дозвола за слетување, но бил принуден да маневрира кога друг авион се појавил на неговиот пат.
Американските воздухопловни сили го истражуваат случајот. „Можеме да потврдиме дека авион Б-52 доделен на воздухопловната база Минот прелетал над државниот саем во Северна Дакота во петокот навечер“, рекоа тие. Прелетот бил најавен за 19:40 часот, што е приближно исто време кога слетал авионот на „СкајВест“.
Кулата за контрола на воздушниот сообраќај не ја управувала Федералната администрација за воздухопловство, туку подизведувачот Мидвест АТС.
Што се слуша на аудио снимката?
На аудио снимката од инцидентот, може да се слушне како пилотот објаснува што се случило и зборува за авионот „кој доаѓа кон нив“. „Никој не ни кажа за тоа“, рече неидентификуваниот пилот. Тој додаде дека контролата на сообраќајот го замолила да се јави кога бил на шест милји од аеродромот.
Тој изјавил дека свртел десно откако стапил во контакт со кулата, но потоа го видел авионот од десно, па контролорот на летање го советувал да сврти лево. Пилотот забележал дека поради брзината на другиот авион, мислел дека е воен авион.
„Не знам колку брзо се движеле, но биле многу побрзи од нас. Мислев дека е најбезбедно да се свртам“, рече тој. Се извини за „агресивниот маневар“.
„Бев изненаден. Накратко, не беше забавно, се извинувам за тоа и ви благодарам за разбирањето“, додаде тој, пред патниците да го поздрават со громогласен аплауз.
Патничка: Како леталото да се сврте
Патничката Моника Грин изјави за CNN дека се подготвувале за слетување кога почувствувала ненадеен потрес од авионот „како авионот да се свртел“. Потоа го слушнала пилотот како им се извинува. Пилотот им ветил на патниците дека ќе им објасни сè штом ќе слетаат.
Грин, која многу патува поради работа, призна дека никогаш не доживеала нешто слично на она што го доживеала тој ден.
Б-52 Стратофортрес е тежок бомбардер со долг дострел способен за извршување на различни мисии. Способен е да лета со голема субсонична брзина на надморска височина до 15.000 метри и може да носи „нуклеарно или прецизно водено конвенционално оружје“.
