На 11 септември, 70-годишниот Болсонаро беше осуден на повеќе од 27 години затвор за обид за пуч по неговиот пораз на изборите во 2022 година.
Според проценките на локалните медиуми, повеќе од 40.000 луѓе учествувале на протестите во големите градови Сао Паоло и Рио де Женеиро. На демонстрациите на плажата Копакабана во Рио, се придружија и познатите бразилски музичари Каетано Велосо, Гилберто Гил и Чико Буарке, пренесе ДПА.
Десничарскиот поранешен претседател моментално е во домашен притвор. Неговиот правен тим најави дека ќе поднесе жалба на пресудата. Во исто време, поддржувачите на Болсонаро во Парламентот се обидуваат да го забрзаат усвојувањето на законот за амнестија кој би можел да му користи нему и на неговите сојузници.
На 8 јануари 2023 година, поддржувачите на Болсонаро упаднаа во Конгресот, Врховниот сојузен суд и претседателската палата во Бразилија. Иако поранешниот претседател тој ден беше во САД, Врховниот сојузен суд на Бразил го сметаше за индиректно одговорен за настаните. Неговите адвокати ги негираа обвиненијата за време на целиот процес.
Ei, Bolsonaro, vem ver quantos aqui na Paulista te querem atrás das grades. Sem anistia. pic.twitter.com/wPfJgPf34k
— GugaNoblat (@GugaNoblat) September 21, 2025
Бразил останува длабоко поларизиран помеѓу поддржувачите на левичарскиот претседател Луис Инасио Лула да Силва и оние на неговиот десничарски претходник, Болсонаро. Некои ги сметаат кривичните постапки за политички мотивирани, додека други ги гледаат како демонстрација на институционална сила.
Експертите предупредија дека неделите по пресудата на Болсонаро би можеле да бидат обележани со протести.
