Украинскиот претседател Володимир Зеленски воведе санкции врз 26 физички лица и 31 правно лице кои го снабдуваат рускиот воено-индустриски комплекс, го олеснуваат заобиколувањето на санкциите и вршат нелегални активности на привремено окупираните територии, соопшти украинската претседателска прес-служба.
Санкциите вклучуваат компании кои произведуваат и сервисираат подводни, површински и воздушни беспилотни системи, опрема за електронско војување, системи за воздушна одбрана, оклопни возила, подморници, бродови и делови за нив, како и производители и сервисери на хеликоптери Ми-8, Ми-17, Ми-171, Ми-172 и Ми-14, објавија украинските медиуми.
Санкции беа воведени против седум физички лица и 11 правни лица кои го олеснуваат заобиколувањето на санкциите, вклучувајќи производители на делови за ракетите Х-101, Х-59М2/М2А и Искандер-К, како и компании вклучени во нелегален бизнис на привремено окупираните територии и изградбата на Кримскиот мост.
Советникот на претседателот на Украина за политика на санкции, Владислав Власјук, изјави дека овие мерки „удираат во сржта на рускиот воено-индустриски комплекс“ и дека Украина ќе продолжи да го зголемува притисокот заедно со меѓународните партнери.
Зеленски ги повика меѓународните партнери да не ги укинуваат санкциите врз Русија и да не ѝ дозволуваат да ја продолжи војната на овој начин.
