Украинскиот претседател Володимир Зеленски на социјалните мрежи напиша дека прелиминарните информации сугерираат дека две ракети погодиле станбена област во градот. Точниот број на жртви сè уште не е познат.
- За жал, вака Русите се однесуваат кон животот и луѓето, напиша Зеленски на социјалните мрежи. „Тие продолжуваат со убиствата, и покрај сите напори на светот, а особено на Соединетите Американски Држави, во дипломатскиот процес. Единствено Русија е таа која не сака оваа војна да заврши“, додаде тој.
Градоначалникот на Харков, Ихор Терехов, првично објави на Телеграм дека 16 лица се повредени и дека е предизвикана значителна штета по напад врз повеќекатна зграда.
Во јужниот украински град Херсон, 51-годишен маж бил фатално повреден во руски напад, изјави гувернерот Олександар Прокудин. Тој додаде дека нападите врз термоелектрана би можеле да доведат до прекини во снабдувањето со топлинска енергија.
Украинското Министерство за енергетика рано утрово соопшти дека Русија уште еднаш ја нападнала енергетската инфраструктура, особено во регионите Запорожје и Миколаив. Како резултат на штетите предизвикани од руските напади, многу региони во земјата имаат електрична енергија само по неколку часа дневно.
Во главно окупираниот регион Луганск, повеќе од 85.000 корисници останале без струја по украински напади, јави руската државна новинска агенција Тас, повикувајќи се на окупациските власти. Засегнати се четири градови и соседните населби.
Информациите од завојуваните страни не можат независно да се проверат, потсетува ДПА.
