Во индиската држава Утар Прадеш, 15 лица загинаа, а пет се повредени во изминатите 48 часа, додека 117 куќи се оштетени, соопштија локалните власти, објави Ројтерс.
Бурите и обилни дождови погодија 63 области, при што индиската држава доби 19 пати повеќе врнежи од дожд во 24-часовниот период што заврши вчера.
Во Непал, три деца и една жена загинаа кога лизгање на земјиштето ја затрупа нивната куќа додека спиеја во селото Ниши Кола во округот Баглунг, изјави највисокиот функционер на округот, Кришна Прасад Ачарја.
Десет непалски работници се водат како исчезнати откако лавина го затрупа базниот камп на планината Химлунг Химал, висока 7.126 метри, во северниот округ Мананг, соопштија планинарските службеници.
Исчезнатите работници поставувале шатори за странски алпинисти, кои не биле присутни кога се случила лавината.
Непалските власти предупредија на можни ненадејни поплави во 49 од 77-те области во земјата, при што повеќе од половина се соочуваат со висок ризик од поплави или ненадејни поплави, бидејќи нивото на водата во главните реки и нивните притоки продолжува да расте.
ओहो 27/09/2026 Nepal massive Flooding 🇳🇵 https://t.co/eqIlK4AxjA
— Kiran Joshi ( Follow Back 100%) Live #Ukraine (@Kiranjoshi900) September 27, 2026
Шанти Махат, портпаролка на Националниот орган за намалување и управување со ризици од катастрофи на Непал, изјави дека областите Расува и Нувакот, кои беа погодени од катастрофални поплави минатиот месец во кои загинаа повеќе од 1.450 луѓе, треба да останат во состојба на готовност, но во моментов не се сметаат за области со висок ризик.
Поплавите на реката Рахуганга ја оштетија структурата и столбовите на далноводот на хидроелектрана од 40 мегавати, изјави министерот за водни ресурси и енергија Бирај Бхакта Шреста.
Поплавите и лизгањата на земјиштето, исто така, ги прекинаа телекомуникациите во делови од Непал, откако оштетија оптички кабли и енергетски системи.
Во Индија, Централната комисија за води соопшти дека 30 станици за следење на нивото на водата во седум држави се во „критична ситуација“, при што нивото на водата ја преминува границата на опасност од прелевање.
Неколку големи реки, вклучувајќи ги Ганг, Гандак, Коси, Багмати и Нармада, ги надминаа нивоата на предупредување за поплави на мерните станици.
