Мелони разговараше со британскиот премиер Кир Стармер и германскиот канцелар Фридрих Мерц пред да учествува на средбата со Стармер, Мерц, францускиот претседател Емануел Макрон и канадскиот премиер Марк Карни.
Канцеларијата на Мелони соопшти дека средбата со Стармер дала можност за продлабочена дискусија за најитните прашања на меѓународната агенда, почнувајќи од ситуацијата на Блискиот Исток и конфликтот во Украина.
„На средбата, исто така, продолжи тесната координација како во однос на дневниот ред на Г7, така и во пресрет на самитот на НАТО во Хаг, со целосно приближување на ставовите. На крајот двајцата лидери ги разгледаа главните области на билатералната соработка, особено во областите на енергетиката, промоцијата на инвестициите, безбедноста и одбраната, со посебно внимание на сè поплодната соработка во борбата против нелегалната миграција и трговијата со луѓе“, соопшти канцеларијата на Мелони.
Кабинетот на Мелони соопшти дека средбата со Мерц „овозможила потврда на заедничката волја за организирање нова меѓувладина средба меѓу Италија и Германија во Рим на почетокот на 2026 година, како и за одржување на тесна координација по клучните прашања на агендата на ЕУ, како што се борбата против нелегалната миграција и конкурентноста. Средбата, исто така, овозможи размена на мислења за најновите случувања на Блискиот Исток и војната во Украина во контекст на трансатлантските односи и во пресрет на претстојниот самит на НАТО во Хаг“, се вели во соопштението.
