Хамас денеска посочи дека е отворен за постигнување договор за прекин на огнот со Израел, но не го прифати предлогот поддржан од претседателот на Соединетите Американски Држави, Доналд Трамп, нагласувајќи дека секој договор подразбира крај на војната во Газа, објави АП.
Трамп претходно изјави дека Израел се согласил со условите за 60-дневен прекин на огнот во Газа и го повика Хамас да го прифати договорот пред да се влошат условите.
Американскиот претседател го зголеми притисокот врз Израел и Хамас да постигнат договор за прекин на огнот и да ја прекинат војната.
Според изјавата на Трамп, 60-дневниот период ќе биде искористен за да се постигне крај на војната, што Израел го отфрли сè додека Хамас не биде поразен.
Сепак, Хамас нагласи дека е подготвен да прифати секој договор што јасно води кон целосен крај на војната.
Функционерот на Хамас, Тахер ал-Нуну, рече дека Хамас е сериозен во врска со постигнувањето договор.
Според информации од Египет, делегација на Хамас се сретнала со египетски и катарски медијатори во Каиро за да разговара за предлогот.
Службениците велат дека најновиот предлог вклучува 60-дневен договор со кој делумно ќе се повлечат израелските трупи од Газа и ќе се зголеми хуманитарната помош.
Сепак, Израел не се обврза да преговара за крај на војната според најновиот предлог.
Не беше јасно колку заложници ќе бидат ослободени, но во претходните разговори се споменуваа околу 10 заложници.
Израел сè уште не коментираше јавно за најавата на Трамп.
Трамп напиша на Truth Social дека Израел се согласил со потребните услови за финализирање на прекинот на огнот, а воедно го повика Хамас да го прифати договорот, предупредувајќи дека одбивањето ќе доведе до влошување на ситуацијата.
