Причината за смртта не е потврдена, а полицијата започнала истрага за нејзината смрт. Нејзиниот сопруг, кој бил во водата со неа, бил однесен во болница и лекарите се борат за неговиот живот.
Бразилските медиуми објавија дека во водата имало силен мирис на хемикалии пред тренингот. Според полицискиот извештај, тој ден за време на тренингот имало вкупно девет лица во водата.
Покрај инструкторката и нејзиниот сопруг, уште три лица се пожалиле на здравствени проблеми по тренингот. Момче (14) е на респиратор, а уште две лица оттогаш се пуштени од болница на домашно лекување.
Снимките од безбедносните камери покажуваат како младата жена е извлечена во несвест од водата, додека нејзиниот сопруг ги предупредува другите пливачи веднаш да излезат од водата.
Подоцна, младата инструкторка била видена како седи на подот во близина на рецепцијата во теретана, видливо исцрпена и имала тешкотии со дишењето. Срцето престанало да ѝ чука. И покрај обидите да ја реанимираат, младата жена починала.
Полициската истрага е фокусирана на работник кој бил снимен на камера како меша хемикалии во кофа, а потоа ја остава покрај базенот.
За да се утврди причината за несреќата, супстанциите биле конфискувани од просторијата и биле земени примероци од вода.
Сведоците изјавиле за бразилската телевизиска станица UOL дека просторот за пливање бил исто така лошо вентилиран.
Тие се сомневаат дека луѓето најверојатно вдишувале токсични испарувања.
Истрагата открила дека теретаната во која се наоѓал базенот работела без лиценца и сега е затворена.
