Договорот има за цел да стави крај на повеќе од тридеценискиот конфликт во источно Конго, богато со минерали. Церемонијата се одржа во Институтот за мир, неодамна преименуван во Институт за мир „Доналд Џеј Трамп“.
Трамп рече дека САД ќе склучат билатерални договори со двете земји за ископување ретки земјени метали, додавајќи дека големи американски фирми ќе бидат испратени во регионот и „сите ќе заработат многу пари“.
Претседателот на Руанда, Кагаме, рече дека претходните обиди за ставање крај на конфликтот пропаднале, но Трамп успеал таму каде што другите не. Конгоанскиот претседател Чисекеди го нарече договорот почеток на нов и тежок пат. Двајцата лидери разменија малку гестови и не се ракуваа, пренесе ДПА.
Договорот се надоврзува на прелиминарната мировна рамка постигната пред неколку месеци, обврзувајќи ги двете земји да го почитуваат територијалниот интегритет, да ја запрат агресијата и да престанат со поддршката за вооружените групи.
Сепак, регионалните аналитичари велат дека е нејасно дали договорот навистина ќе го заврши деценискиот конфликт.
Поважни од договорот, велат тие, се разговорите во Доха кои вклучуваат претставници на милицијата М23 поддржана од Руанда, која претходно годинава ги зазеде провинциските главни градови Гома и Букаву во регионот Киву и формираше сопствена администрација во контролираните територии.
