Германскиот второлигаш Бохум им забрани на своите навивачи организирано и ритмички да скокаат на дел од источната трибина на стадионот „Рурштадион“, поради силните вибрации што се создаваат во конструкцијата.
Инженерските проверки покажале дека носивоста на трибината не е загрозена, но истовременото скокање на голем број луѓе предизвикува таканаречен „ефект на трамбулина“, односно забележливо нишање на трибината. Тоа може да предизвика физичка непријатност, па дури и мачнина кај дел од гледачите.
Забраната ја наложиле градските власти, а ќе важи за деловите од источната трибина со места за стоење. Мерката ќе се применува од неделниот натпревар против Арминија Билефелд. Важно е што не е забрането спонтаното скокање при прослава на гол, туку организираното и синхронизирано скокање на поголеми групи навивачи.
Од Бохум предупредуваат дека непочитувањето на правилото може да доведе до целосно затворање на источната трибина, што би предизвикало сериозен проблем за домашните навивачи.
