ФБИ истражува тврдења на хакерска група која објави дека украла чувствителни информации за илјадници вработени.
Хакери од колективот „ShinyHunters“ тврдат дека ги поседуваат приватните податоци на сите 38.000 вработени во Бирото, како и податоците на кандидатите кои аплицирале за работа, пренесува Би-Би-Си.
Според нивните тврдења, базата на податоци ги содржи имињата на агентите, нивните функции, службените броеви и личните податоци, вклучувајќи домашни адреси, телефонски броеви и информации за брачните другари. Дел од податоците наводно содржат детали за работни задачи, вклучувајќи и доверливи операции против кинески шпиони, руски разузнавачки служби и нарко-картели. Достапните примероци од податоците изгледаат автентично.
ФБИ објави на платформата „X“ дека е запознаено со наводите и дека агенцијата „активно и темелно го истражува овој случај“. Хакерите тврдат дека упаднале во серверите на ФБИ во понеделникот вечерта, а веќе во вторникот почнале да контактираат со новинари и да им испраќаат примероци од украдените податоци.
„ShinyHunters“ е меѓународна хакерска група за која се верува дека потекнува од Франција. Групата е одговорна за низа големи напади, вклучително и нападот врз Rockstar Games во април и врз образовната платформа Canvas во мај, кои предизвикаа значителни пречки во работењето.
Хакерите тврдат дека откриле безбедносен пропуст во системот за складирање податоци во облак на Oracle, кој го користи ФБИ. Според нив, овој пропуст им овозможил да упаднат во повеќе системи, вклучувајќи ги FBIJOBS, FBI BEAST (за проверка на вработени и кандидати), FBI MedLink (со здравствени досиеја на агентите) и FBI BICS (кој содржи информации за истраги).
Групата на „дарк веб“ (dark web) објави дека не го хакирала системот на ФБИ поради пари.
Наместо тоа, тие бараат од агенцијата да го повлече официјалното предупредување што го издаде за нив. Велат дека се навредени од начинот на кој биле опишани.
Во таа изјава, ФБИ ги опиша ShinyHunters како опасни актери кои често „користат вистински или преувеличени тврдења за пристап до чувствителни или лични информации за да изнудат пари од жртвите“.
„Тие се насочени кон големи технолошки, финансиски и малопродажни компании, честопати крадејќи милиони кориснички записи одеднаш“, се наведува во предупредувањето. ShinyHunters му даде на бирото рок од една недела да ги исправи или отстрани она што го тврдат како лажни обвинувања.
Во спротивно, се закануваат дека ќе ја објават целата база на податоци.
Во објава на платформата X, агенцијата изјави дека се обидува да утврди дали хакерите директно ги пробиле нејзините системи или компромитирале систем на трета страна. „Активно и интензивно го истражуваме ова прашање и тесно соработуваме со надворешните даватели на услуги кои ја поддржуваат страницата FBIJobs.gov за да ги ублажиме сите ризици“, се вели во објавата. Аналитичар за сајбер безбедност го опиша инцидентот како одмазднички напад, истакнувајќи дека тоа покажува дека „ниту една организација не е безбедна од оваа група“.
