На почетокот на годината, таа запознала маж преку интернет. Комуникацијата брзо се префрлила на апликација за пораки, каде што таа започнала наводна романтична врска - иако никогаш не го запознала лично, објави Феникс.
Измамникот тврдел дека работи на нафтена платформа
Измамникот ѝ презентирал на Германката приказна дека е сопственик на компанија која моментално работи на нафтена платформа. Тој тврдел дека се соочува со финансиски проблеми, поради што таа му платила вкупно 200.000 евра во текот на шест месеци на неколку различни сметки што ги навел.
Кога неговите приказни станале сомнителни, жената започнала истрага и открила неколку онлајн профили со негова фотографија, но под различни имиња. Потоа решила да го пријави случајот во полиција.
Сторителот сè уште не е идентификуван
Полицијата во Мајнц сè уште не можела да го утврди идентитетот на сторителот.
- Можно е тој да е во странство, што дополнително ја комплицира истрагата - изјави портпаролката на полицијата.
Полицијата ги предупредува граѓаните за зголемената фреквенција на измами од овој тип и апелира на претпазливост, особено кога се бараат пари од необични причини.
Само пред две недели, суд во Висбаден осуди 46-годишен маж на седум години затвор за слична љубовна измама, во која измамил три жени за повеќе од 300.000 евра. Во тој случај, измамникот се сретнал лично со жртвите, за разлика од најновиот случај во Бад Кројцнах.
